أكد الفنان والمصوّر وصانع المحتوى سعيد أبو دشيشة أن العالم بيشهد حاليًا واحدة من أكبر وأخطر الثورات في تاريخه الحديث، وهي “ثورة الذكاء الاصطناعي”، اللي بدأت تفرض نفسها على كل المجالات، وبتغير شكل الحياة زي ما نعرفها.
وقال “أبو دشيشة”: “الذكاء الاصطناعي مش مجرد تطور تقني، ده انقلاب في طريقة الشغل والتفكير والإبداع. النهارده كل اللي كان بيحتاج وقت ومجهود وخبرة، بقى في متناول أي حد عنده فكرة وإرادة يتعلم.”
وأشار إلى أن التقنيات الذكية بقت بتخدم المصورين، والمصممين، وصناع المحتوى، والأطباء، والمهندسين، وحتى الناس اللي بتبدأ من الصفر، واللي بيعرف يركب الموجة دي، هيوصل لأماكن عمره ما تخيلها.
وأضاف: “أنا واحد من الناس اللي استخدموا الذكاء الاصطناعي في تطوير شغلي، وده فرق معايا كتير. بقى عندي وقت أكتر للإبداع، وشغلي بقى أسرع وأقوى. بقيت أقدر أخلّي الفكرة تطلع للنور في وقت قصير وبجودة عالية.”
وحذر “أبو دشيشة” من تجاهل التحول الكبير اللي بيحصل، مؤكدًا إن العالم مش هيستنى، وإن الجاي أسرع مما نتخيل. وقال: “الثورة دي مش لسه هتيجي، دي بدأت، ومفيش وقت للتردد. لازم كل واحد يطور نفسه ويبدأ يتعلم ويتعامل مع الذكاء الاصطناعي على إنه أداة نجاح مش تهديد.”
