كتب: مؤمن محمد
فريدة، إنتي أول مصرية تجمعي بين ألقاب كبيرة زي ملكة جمال العرب 2023-2024، ملكة جمال أفريقيا 2025-2026، ملكة جمال شمال أفريقيا 2024، وملكة جمال الكون – مصر 2024-2025. إيه أكتر حاجة بتمثّل ليكي قيمة في كل اللقب ده؟
-كل لقب ليه معنى خاص. ملكة جمال العرب كان بداية الرحلة، علّمني إن صوت مصر لازم يكون مسموع في المنطقة كلها. ملكة جمال شمال أفريقيا فتحلي باب أوسع للتواصل مع دول أفريقية قريبة مننا. أما ملكة جمال أفريقيا فهو أكبر دليل إن مفيش مستحيل، وإن مصر تقدر تكون دايمًا في المقدمة. وأخيرًا ملكة جمال الكون – مصر بيحملني مسؤولية إني أمثّل بلدي قدام العالم كله.
– ألقاب كتيرة، ومسؤوليات أكتر… إيه أصعب جزء في التجربة دي كلها؟
الصعوبة مش بس في المنافسة، لكن في الاستمرارية. إنك تحافظي على صورة قوية، وتوازني بين حياتك الشخصية واللقب. أنا اتعلمت إن النجاح مش لحظة، النجاح رحلة طويلة محتاجة التزام وصبر
-في رأيك، إيه اللي بيميز مصر وسط العالم في مجال الجمال والثقافة؟
مصر مش مجرد بلد عندها تاريخ، إحنا بلد عندنا قصة مستمرة من آلاف السنين. الحضارة، الفن، الجمال الطبيعي، الشخصية المصرية… كل ده بيخلّي مصر مختلفة. وأنا دايمًا بقول: أي بنت مصرية واقفة على أي مسرح عالمي، هي مش واقفة لوحدها، هي واقفة ومعاها قوة ٧٠٠٠ سنة.
-إيه خططك للفترة اللي جاية بعد كل اللي حققتيه؟
نفسي أركز أكتر على شغل يدمج بين السياحة وتمكين المرأة. عايزة العالم يشوف مصر بجمالها الحقيقي، من الأهرامات للنيل، ومن شعبها لثقافتها. وفي نفس الوقت عايزة أفتح أبواب قدام البنات إنهم يصدقوا إن كل حلم ممكن.
– لو عندك رسالة سريعة توجهيها للشباب والبنات اللي بيتابعوك… إيه هتكون؟
هقولهم: خليكوا مؤمنين إن الطريق الصعب هو اللي بيعمل النتيجة الكبيرة. متخافوش من الفشل، متخافوش من كلمة “لا”. كل خطوة قدام هتوصلكم لمكان يستاهل.
